विजय शिंदे
राज्यातील विधानसभा निवडणुकीसाठी प्रत्येक पक्षाने आपली कंबर कसली आहे. एकीकडे राज्यात महाविकास आघाडी आणि महायुतीमध्ये मोठी लढत दिसत आहे. या दोघांमधीलही जागावाटपाचा फॉर्म्युला अद्यापही समोर आलेला नाही.त्यामुळे आता कोणता पक्ष किती जागांवर निवडणूक लढणार हे जाणून घेण्याची उत्सुकता सर्वांनाच लागलेली आहे. पण असे असतानाही काही पक्षांकडून उमेदवारांची यादी जाहीर न करताच एबी फॉर्मचे वाटप करण्यात आले आहे.
इंदापूर विधानसभेसाठी राष्ट्रवादी काँग्रेस शरदचंद्र पवार पक्षाचे हर्षवर्धन पाटील तसेच राष्ट्रवादी काँग्रेसचें विद्यमान आमदार दत्तात्रय भरणे यांना एबी फॉर्म मिळाला असल्याचे खात्रीलायक सूत्रांनी माहिती दिली आहे.
सोमवारी (ता. 21 ऑक्टोबर) राष्ट्रवादी काँग्रेस अजित पवार गटाने इच्छुक उमेदवारांना एबी फॉर्म देऊ केले. त्यानंतर आता राष्ट्रवादी काँग्रेस शरदचंद्र पवार पक्षाने देखील एबी फॉर्म वाटण्यास सुरुवात केली आहे.राज्यातील विधानसभा निवडणुकीसाठी आजपासून अर्ज भरण्यास सुरुवात झाली आहे. त्यामुळे कोणत्या पक्षाकडून कोणाची उमेदवारी निश्चित होणार? याबाबतची माहिती लवकरच समोर येईल. पण आज मंगळवारी (ता. २२ ऑक्टोबर) शरद पवार यांनीही अनेकांना एबी फॉर्म दिले आहेत. आहे. शरद पवारांनी एबी फॉर्म देण्यास सुरुवात केल्यामुळे अनेक इच्छुक उमेदवारांनी पक्ष कार्यालयात गर्दी केल्याची माहिती समोर येत आहे.
शरद पवार यांच्या राष्ट्रवादीने इस्लामपुरातून जयंत पाटील, इंदापुरातून हर्षवर्धन पाटील, काटोलमधून अनिल देशमुख, कर्जत जामखेड मतदारसंघातून रोहित पवार, घनसावंगी मतदारसंघातून राजेश टोपे, मुंब्रामधून जितेंद्र आव्हाड, कवठे महाकाळमधून दिवंगत आर. आर. पाटील यांचे पुत्र रोहित पाटील, कराड उत्तरमधून बाळासाहेब पाटील, कोरेगावमधून शशिकांत शिंदे, माळशिरसमधून उत्तमराव जानकर, सिंदखेडराजामधून राजेंद्र शिंगणे, राहुरीमधून प्राजक्ता तनपुरे, मुक्ताईनगरमधून रोहिणी खडसे, कागलमधून समरजितसिंह घाटगे, इचलकरंजीमधून मदन कारंडे आणि चंदगडमधून डॉ. नंदिनी बाभुळकर यांचा उमेदवारांच्या यादीत समावेश आहे.
