विजय शिंदे
आषाढी एकादशीनिमित्त पंढरपुरात भक्तीचा महापूर उसळला आहे. या भक्तीमय वातावरणात मुख्यमंत्री एकनाथ शिंदे यांनी सपत्नीक विठूरायाची महापूजा केली. यावेळी पालकमंत्री चंद्रकांत पाटील, ग्रामविकास मंत्री गिरीश महाजन, आरोग्य मंत्री तानाजी सावंत यांच्यासह अनेक मंत्री-खासदार उपस्थित आहेत.
भरपूर पाऊस पडू दे आणि शेतकरी सुखी-समाधानी राहू दे असं साकडं मुख्यमंत्री एकनाथ शिंदे यांनी पांडुरंगाला पूजेदरम्यान घातले.
आषाढी एकादशीनिमित्त यंदा विठ्ठल-रखुमाईच्या शासकीय पुजेचा मान मुख्यमंत्री एकनाथ शिंदे यांना मिळाला. त्यांच्या सोबतच नाशिक जिल्ह्यातील बाळू शंकर अहिरे व आशा बाळू अहिरे या वारकरी दाम्पत्याला शासकीय महापूजेसाठी उपस्थित राहण्याचा मान मिळाला. अहिरे दाम्पत्य हे नाशिक जिल्ह्यातील अंबासन येथील रहिवासी आहे. हे दाम्पत्य गेल्या १६ वर्षांपासून अखंडपणे पंढरपूरच्या वारीत सहभागी होत वारी करत आहेत. दरम्यान, आषाढी यात्रेनिमित्त पंढरपुरात भविकांची मांदियाळी बघावयास मिळत आहे. जवळपास १५ लाख भाविक पांडुरंगाच्या दर्शनासाठी पंढरपुरा दाखल झाले आहेत. चंद्रभागेच्या तिरावर स्नानासाठी पहाटेपासूनच भाविकांची गर्दी झाली आहे.
पाऊस आणि शेतकरी सुखासाठी मुख्यमंत्र्यांचे विठूरायाला साकडे
दरम्यान, राज्यात भरपूर पाऊस पाणी पडत शेतकरी सुखी-समाधानी राहू दे. राज्याती सर्व क्षेत्राची प्रगती होत प्रगतीला अधीक चालना मिळवी, असं साकडं आपण पंढरपूरच्या पांडुरंगाला घातल्याचे मुख्यमंत्री एकनाथ शिंदे यांनी सांगितले. परंपरेनुसार, मुख्यमंत्री शिंदे यांनी सपत्नीक विठ्ठल-रखुमाईची शासकीय महापूजा केली. पहाटे अडीच वाजेपासून या शासकीय पूजेला सुरुवात झाली होती.
पंढरपुरात टोकन दर्शन व्यवस्था सुरू करणार; मुख्यमंत्र्यांची घोषणा
दरम्यान, तिरुपती बालाजीच्या धर्तीवर पंढरपुरात टोकन दर्शन व्यवस्था सुरू करण्यात येईल. यामुळे पंढरपूरला विठ्ठल-रुक्मिणीच्या दर्शनासाठी येणाऱ्या लाखो भाविकांना विठुरायाचे सुलभ आणि कमीत कमी वेळेत पदस्पर्श दर्शन घेता येईल. यासाठी राज्य सरकारकडून १०३ कोटी रुपयांचा निधी लवकरच देईल, अशी घोषणा मुख्यमंत्री एकनाथ शिंदे यांनी केली. महापूजा संपन्न झाल्यावर मंदिराच्या सभा मंडळात झालेल्या सत्कार समारंभाच्या कार्यक्रमात ते बोलत होते.
यावेळी पुढे बोलतान मुख्यमंत्री शिंदे म्हणाले, राज्यात भरपूर पाऊस पाणी पडू दे आणि शेतकऱ्याच्या सुखी समृद्धीसाठी आपण पांडुरंगाला साकडं घातल्याचंही ते म्हणाले. रस्ते, पाणी, दिवाबत्ती या सगळ्या गोष्टी होत राहतील. पांडुरंगा प्रमाणेच हे सरकार देखील सर्वसामान्यांचं आहे. यामध्ये कुठेही काही कमी पडणार नाही. वारकरी बांधव-भगिनींचं मिळालेलं प्रेम हे माझे भाग्य आहे. मी आपला ऋणी आहे, असंही मुख्यमंत्री शिंदे म्हणाले.
